चैत्र २, काठमाडौं । काठमाडौं जिल्ला बचत तथा ऋण सहकारी संघ लि. (कास्कून) को आयोजना र नेफ्स्कूनको साझेदारीमा २०८० चैत्र २ गते साकोस जोखिम विश्लेषण कार्यशाला सम्पन्न भएको छ । नेफ्स्कून तालिम हल चाबहिलमा संचालित कार्यशालामा संघकी उपाध्यक्ष बिनिता अधिकारीको अध्यक्षता र नेफ्स्कूनकी कार्यक्रम अधिकृत सोबिता मैनालीको सहजीकरण रहेको थियो भने सदस्य सेवा कार्यालय चाबहिलकी ईन्चार्ज राधा कुमारी पोखरेल तथा कास्कूनका व्यवसाय सहायक बिश्वास पौडेलको समेत उपस्थिति थियो ।
कार्यक्रमको अध्यक्षता गर्नुभएकी अधिकारीले सहकारी ऐन, नियमावलीमा आधारित भई संस्थाको विनियम र आन्तरिक कार्यविधि मार्फत संस्थालाई संचालन गर्नुपर्ने र सहकारी सिद्धान्तको व्यावहारिक प्रयोगमा लाग्नु पर्ने बताउनुभयो । सदस्यहरुको बचतको सुरक्षा गरी प्रभावकारी ऋण परिचालन मार्फत स्थानीय उद्यमशीलता र रोजगारी प्रवद्र्धनको माध्यमबाट वित्तीय जीवन सुरक्षित र समृद्ध बनाउन उहाँले आग्रह गर्नुभयो । सदस्यहरुको लगानीको बचत र प्रतिफलका लागि सुशासन युक्त साकोस निर्माण गर्ने संस्थाका सबै पक्षले जिम्मेवारीलाई आत्मसाथ गरी लाग्नु पर्ने उहाँको सुझाव थियो ।
कार्यक्रममा नेफ्स्कूनक चाबहिल सदस्य सेवा कार्यालयकी इन्जार्च पोखरेलले सहकारीका जोखिमका क्षेत्रहरुको विश्लेषण र समाधानका उपायहरु समेत पहिचान गर्ने कार्यक्रम रहेकोले यसलाई विशेष बनाउन सहभागीहरुसमक्ष अनुरोध गर्नु भएको थियो ।
सहभागी साकोसहरुबाट प्राप्त विवरणहरुका आधारमा संस्थाको जोखिमस्तर पहिचान गर्नुका साथै आगामी रणनीतिका विषयमा नेफ्स्कूनकी कार्यक्रम अधिकृत सोविता मैनालीले सहजीकरण गर्नुभएको थियो ।